Мягмаг гарагт Газын зурваст Хамас бүлэглэлийг эсэргүүцсэн олон зуун хүний жагсаал болсон байна. Энэ нь Израил-Хамасын дайн эхэлснээс хойш палестинчууд хотын гудамж талбайдаа олноороо гарч, Хамасын эсрэг жагссан хамгийн том жагсаал боллоо.
Хамасын эсрэг иргэдийн эсэргүүцлийн жагсаал Газын зурвасын хойд хэсгийн Бейт Лахиа хотын гудамж талбайд болж, голцуу залуучууд оролцсон жагсаалын үеэр жагсагчид “Хамасын засаглалыг нураая, Хамас бүлэглэлийг Газын зурвасаас зайлуулцгаая” хэмээн орилж хашгирч байсан байна.
Жагсаалын үеэр нүүрээ далдалж, буу зэвсэг, бороохой барьсан Хамасын цэргүүд жагсагчдыг хүчээр тараах гэж оролдсон байна.
Харин Хамас бүлэглэлийг дэмжигч палестинчууд мягмар гарагийн эсэргүүцлийн жагсаалыг тийм ч чухал үйл явдал биш хэмээн үгүйсгэж, жагсаалд оролцогчдыг урвагчид хэмээн буруутгажээ. Эсэргүүцлийн жагсаалын талаар одоогоор Хамас бүлэглэл ямар нэгэн мэдэгдэл гаргаагүй байна.
Хамас бүлэглэл 2006 онд явагдсан сонгуулиар ялалт байгуулан, улмаар 2007 оноос хойш Газын зурвасын бүс нутгийг дангаараа удирдсаар байна. Харин 2023 оны 10-р сард Израил-Хамасын дайн эхэлснээс хойш тус бүлэглэлийг ил тод, нээлттэйгээр эсэргүүцэн шүүмжлэх явдал өсөн нэмэгдсэн боловч Хамаст үнэнчээр хүчин зүтгэдэг хүмүүс ч мөн байсаар байгаа юм.
Эргэн сануулахад, 2023 оны 10-р сарын 7-нд Хамас бүлэглэл Израил улсад халдан довтолсны улмаас 1200 орчим хүн амь үрэгдэж, 251 хүнийг барьцаанд авч байсан бол тухайн цаг үеэс эхэлсэн дайны улмаас Газын зурваст амиа алдсан палестинчуудын тоо 50 мянгыг даваад байна.
3 сарын 1-нд өндөрлөсөн гал зогсоох тохиролцооны эхний шатын дараагаар талууд үргэлжлүүлэн гал зогсоох тал дээр нэгдсэн тохиролцоонд хүрч чадахгүй байснаас үүдэн Израил улс энэ сарын 18-ны өдрөөс Газын зурвас дахь байлдааны ажиллагаагаа ахин эхлүүлээд байгаа ба Израилын батлан хамгаалахын сайд Израэл Катц мягмар гарагт хийсэн мэдэгдэлдээ “хэрвээ Хамас бүлэглэл барьцааны хүмүүсийг суллахгүй, нөхцөл байдлыг үргэлжлүүлэн хүндрүүлсээр байвал тэдэнд чанга хатуу гэсгээл хүртээх болно” гэжээ.
Мягмар гарагт мөн Израилын парламент 2025 оны улсын төсвийн тухай хуулийг дийлэнх олонхын саналаар баталсан байна. Хуулинд зааснаар тус улс энэ жил батлан хамгаалахын салбартаа 110 тэрбум шекел буюу 30 орчим тэрбум ам.долларыг зарцуулахаар болсон нь тус улсын түүхэнд батлан хамгаалахын салбарт зарцуулахаар болсон хамгийн өндөр төсвийн нэг болоод байгааг дотоодын хэвлэлүүд онцолжээ.