УИХ-ын гишүүн Б.Энхбаяр ШШГЕГ-ын төсөв 2 дахин нэмэгдсэн нь Сангийн сайдтай хамааралтай  байх магадлалтай талаар мэдэгдсэн. Түүнчлэн гэрээс нь сэйфтэй мөнгө олдож ял эдэлж байгаа С.Батдөлтэй сангийн сайд хамааралтай эсэхийг шалгах шаардлагатай талаар мэдэгдсэн билээ. Тэгвэл сангийн сайд гишүүний мэдэгдлийг үгүйсгэж нолтохыг шаардлаа.

–УБТЗ-ын газрын дарга С.Батдөл 7,5 тэрбум төгрөгийн авлигын хэргээр ял эдэлж байгаа гэх боловч амралтын газарт амарч байна. ШШГЕГ-ын төсвийг 2025 онд 2 дахин нэмэгдсэн зэрэг асуудал Сангийн сайдтай холбоотой байх магадлалтай гэж УИХ-ын гишүүн Б.Энхбаяр мэдэгдсэн. Үүнд та тайлбар өгөх вэ?

-Байнгын хорооны хуралд хэлсэн Б.Энхбаяр гишүүний үгийг би сонссон. Гэхдээ надтай холбож хэлсэн гэж мэдээгүй юм байна.

–Өнөөдөр өөрөө тантай холбоотой гэж тодруулж хэлсэн

-Б.Энхбаяр гишүүн надтай засгийн газарт хамт ажиллаж байсан. Тохой залгаад, мөр зэрэгцээд ажиллаж байсан. Засгийн газарт ажиллахын зовлон жаргалыг маш сайн мэдэх хүн. Өөрөө энэ салбар чиглэлийн хүн. Иймэрхүү юм ярьж байгаа нь маш харамсалтай байна. Юунд ингээд хорсоод байдгийг нь би гайхаж байна л даа. Сэдэв болгонд л надтай холбож дайраад байдаг юм. Би бол маш тэвчээртэй хүлээцтэйгээр хандаж ирсэн. Гэхдээ хүний тэвчээрт бол хязгаар байдаг шүү. Төсвийн ерөнхийлөн захирагч байсан хүн шүү дээ өөрөө. Өөрийнх нь удирдаж байсан салбарын харьяа байгууллагын төсвийг ярьж байх шиг байсан. Яг хэд дахин нэмэгдсэнийг би одоо тоогоор нь шууд хэлж мэдэхгүй байна. Харьяа байгууллагуудынх нь төсөв нэмэгдээд үйл ажиллагаа нь чанаржиж байвал уг нь сайн л баймаар юм. Тэр С.Батдөл гэж залуу бол манай Дарханых. Аав ээж нь манай намын ахмад гишүүд. Ээж аавыг нь бол танина. Хүүхдүүдээ захиж байсан талууд бол байгаа. Тэрнээс болж тэр асуудалтай намайг холбож надад хар буруу юм наах гэж байгаа бол харин ёстой амжихгүй шүү. Ёстой амжихгүй шүү. ШШГЕГ-т юу болж байгааг би мэдэхгүй. Би асуугаагүй. Асуух шаардлага надад байхгүй. Хуулиараа бие даасан байгууллага. Хэрэв шаардлагатай гэвэл хэвлэлийнхэн тэр байгууллагын дарга цэргээс асууна биз. Хаана яаж хуулийн дагуу хүлээсэн хариуцлагаа эдэлж байгаа талаар мэдэх юм надад алга. Тэр рүү анхаарч явах шаардлага ч алга. Зав зай ч алга. Харин хэвлэлийнхэн та нар араас нь яваад үзчих хэрэгтэй байх шүү. Тэр байгууллагын дарга нараас нь асуух хэрэгтэй. Сангийн сайд ийм юманд оролцдог юм уу үгүй юм уу гээд.

-С.Батдөл гэж хүний сейфээс бэлнээр 7,5 тэрбум төгрөг гарч ирсэн байдаг. Магадгүй тэр авлигын мөнгөтэй таныг холбоотой гэж мэднэ гэсэн хардлага нийгэмд үүсчихлээ шүү дээ. Тийм ч учраас танаас тодруулж байна.

-Ёстой мэдэх юм алга. Хуулийн байгууллага тогтоогоод тэр хүүхэд ял эдлээд явж байна гэж ойлгосон. Тухайн үед ч бас иймэрхүү зүйл гаргаж ирээд над руу дайрч байсан. Дарханых л бол сайн ч бай муу ч бай за ер нь мууг нь наах гэж оролддог юм даа. Хуулийн байгууллага шалгаад тогтоосон байх. Ер нь хуулийнхан дуудаж ч шалгадаг дуудахгүй ч шалгадаг гэж ойлгосон. Надад бол тэр залуутай огт холбоо сүлбээ байхгүй. Тийм шаардлага ч байхгүй гэдгийг онцолж хэлье.

-Б.Энхбаяр гишүүн та 2 хоёулаа хариуцлагатай албан тушаал хашиж байгаа хүмүүс. Та мэдээлэлд гомдол гаргаж хуулийн байгууллагад хандах уу?

-Б.Энхбаяр гишүүнийг өөрийг нь харъя. Хэрвээ намайг буруутгая гэж байгаа бол нотлох хэрэгтэй. Яг юунд хорсоод гүйгээд байгаа юм бүү мэд. Одоо харж л байя.

-ШШГЕГ-ын төсөв нэмэгдсэн нь хариуцсан яамнаас нь орж ирсэн саналтай холбоотой санагдах юм?

-Төсөв болгоныг задалж ярина гэвэл удна. Ер нь бол сангийн яамнаас мэдэж нэмдэг төсөв гэж байхгүй дээ. Төсөв ерөнхийлөн захирагч нараасаа боогдоод ирдэг. Төсвийн хуулийг батлахдаа ирсэн саналуудыг бараг 5-10 дахин бууруулж төсөв боогдож өргөн барьдаг гэж ойлгох хэрэгтэй. Би төсвийн шууд захирагч нарын төсвийг одоо 1 бүрчлэн хэлэх боломжгүй байна. Ер нь төсөв нэмэгдээд үйл ажиллагаа нь сайжраад явах нь тухайн байгууллагын хувьд ялангуяа өөрөө сайд нь байсан хүний хувьд ашгүй дээ гээд бодоод сууж байх ёстой байдаг юм биш үү? Эсвэл надад ямар хорсол байгаа юм, тэр болгоноо надад нааж ярих л сонирхол байх шиг байна.

-Таныг ШШГЕГ-т гэнэт хайртай болчихлоо гэж хэлж байсан шүү дээ

-Үгүй дээ. Төсвийн ерөнхийлөн захирагч нарын санал орж ирээд ном журмын дагуу маш олон шат дараатай явна. Маш олон фильтерүүдийг давж гарч ирнэ. Үүний дараа өргөн баригдана. Тэгээд УИХ-аар нэлээн хэлэлцэгдэнэ. Их хурал чинь бас маш том фильтертдэг шүү дээ. Ингээд хасагдаад нэмэгдээд явсаар төсөв батлагддаг.

-Мэдээлэл өгсөнд баярлалаа.