Монголын Хөлбөмбөгийн холбооны шинэ Ерөнхийлөгчөөр УИХ-ын гишүүн асан Ц.Анандбазарыг сонгосон нь маргаан дагуулж байна. Хэд хэдэн тамирчин эсэргүүцлээ илэрхийлж, Ц.Анандбазар холбоог удирдаж байх хугацаанд ямар ч тэмцээнд оролцохгүй гэдгээ хэлсэн. Мөн хөлбөмбөгийн бусад холбоо болон зөвлөл нэгдэж, шаардлага хүргүүлж байгаа бөгөөд жагсаал зохион байгуулахаа мэдэгдсэн.

Тэгвэл, дээд лигийн “Эс Пи Фалконс” баг нь холбооны ээлжит бус хурлаар Ц.Анандбазарт саналаа өгсөн аж. Харин тус багийн ивээн тэтгэгч NCD групп үүнтэй холбогдуулж, “Эс Пи Фалконс”-ыг ивээн тэтгэх үйл ажиллагааг бүр мөсөн зогсоож, хамтын ажиллагааны гэрээг дуусгавар болголоо хэмээн мэдэгдэл гаргажээ.