Олон төрлийн үйлдэлтэй дэлхийн анхны хиймэл оюун ухаант роботыг Бээжинд танилцууллаа. Энэ нь өөрөө өөрийгөө удирдах чадвартай ухаалаг технологийг олон нийтийн дунд анх удаа оролцуулж байгаа гэдгээрээ онцлогтой. “Хуйси Кайву” нэртэй уг платформыг Аж үйлдвэр, мэдээллийн технологийн яам, Бээжин хотын захиргаа, Бээжингийн хүн дүрст роботуудын инновацын төв зэрэг байгууллагууд бүтээхэд оролцжээ.

Хиймэл оюун ухаант робот нь хүний нэгэн адил орчноо мэдрэх бөгөөд  суралцах, харилцаа үүсгэх чадамжтай.  Тооцоолол, логик үндэслэлд тулгуурлан үйлдэл хийхээр програмчлагджээ. “Хуйси Кайву” нь  эргэн тойрныхныхоо  хүсэлтээр даалгавар гүйцэтгэж үзүүлсэн бөгөөд цаашид  тасралтгүй сурч, дасан зохицох боломжтой гэж үзэж байна.

Робот эхлээд даалгавраа “тархи”-аар төлөвлөж, дараа нь түүний “тархи” тодорхой үйлдлүүдийг гүйцэтгэхийг тушаана. Гүйцэтгэлийн хариуг “тархи” руу буцааж дамжуулж, нарийн төвөгтэй орчинд бие даасан шийдвэр гаргах, нягт нямбай хөдөлгөөнийг ч гүйцэтгэх чадвартай. Мөн атгах, зарим гүйцэтгэлдээ алдаа гаргасан бол түүнийгээ засах зэрэг функцүүдтэй.

Лхагва гарагт болсон “Хуйси Кайву”-г танилцуулах  нээлтийн арга хэмжээний үеэр уг платформ нь үйлдвэрлэлийн ангилах, ширээний цэвэрлэгээ хийх, логистикийн сав баглаа боох  зэрэг дөрвөн хувилбараар ажиллаж үзүүлжээ.  

Тус улсад цаашид хүн дүрст роботуудаас гадна бие даасан жолоодлоготой тээврийн хэрэгсэл, зүүж болох интерактив чадвартай төхөөрөмж зэрэг  хиймэл оюун ухаан оролцсон олон технологи нэвтэрчээ.