Японы Кумамото мужид хоёр хоногийн өмнө болсон 7.1 магнитудын хүчтэй газар хөдлөлтийн дараах эрэн хайх, аврах ажиллагаа үргэлжилж байна. Одоогийн байдлаар 17 хүн амиа алдсан бөгөөд цаасан үйлдвэрийн барилга болон худалдааны төвийн нурангид дарагдсан хүмүүсийг аврахаар ажиллаж байна.

Японы Гал түймэр, гамшгийн удирдлагын агентлагаас долдугаар сарын 30-нд нийтэлсэн дүрс бичлэгт Яцуширо хот дахь Nippon Paper Industries компанийн цаасны үйлдвэрийн нурангиас аврагдсан хүнийг дамнуурган дээр гаргаж буйг харуулжээ. Харин өмнөх өдөр нийтэлсэн өөр нэг бичлэгт Кашима хотын Aeon худалдааны төвийн нурангийг аврагчид нэгжиж байгаа бөгөөд тус барилгад газар хөдлөлтийн дараа хий алдагдсанаас үүдэлтэй дэлбэрэлт болсон байж болзошгүй гэж үзэж байна.

Кумамото мужийн захиргааны мэдээлснээр, амиа алдсан хүмүүсийн ихэнх нь дээрх цаасны үйлдвэр болон худалдааны төвд байсан аж. Мөн зургаан хүн зүрх, уушгины үйл ажиллагаа зогссон байдалтай эмнэлэгт хүргэгдсэн бөгөөд тэдний амь насыг аврахаар эмч нар ажиллаж байна.

Үүнээс гадна газар хөдлөлттэй холбоотой эсэхийг нь тогтоож буй тохиолдлуудыг оруулбал нийт нас баралтын тоо 28 хүрээд байгааг Японы Засгийн газрын ерөнхий нарийн бичгийн дарга мэдэгджээ.

Аврах ажиллагаа үргэлжилж буй энэ үед амралтын өдрүүдэд агаарын температур 40 хэмд дөхөх төлөвтэй байгаа тул халууны улмаас аврагчид болон нүүлгэн шилжүүлсэн иргэд эрсдэлд орохыг эрх баригчид анхааруулсан байна. Иймээс Японы Өөрийгөө хамгаалах хүчин муж даяарх түр хоргодох байр болон бусад байгууламжид 300 орчим агааржуулагч суурилуулж эхэлжээ.