ОХУ 8 дугаар сарын 20-21-нд шилжих шөнө Украин даяар пуужин, дроноор өргөн хэмжээний цохилт өглөө. Энэ үеэр Киев болон түүний ойролцоох бүсүүдэд 17 хүн амиа алдаж, 40 гаруй хүн шархадсан байна. “Reuters”агентлагийн мэдээлснээр энэ нь Украинд дөрвөн жил гаруй үргэлжилж буй дайны хамгийн хүнд довтолгооны нэг болжээ.
168 дрон, олон төрлийн пуужин ашиглав
Украины Агаарын цэргийн хүчний мэдээлснээр Оросын арми довтолгоондоо 168 дрон, баллистик, далавчит болон гиперсоник пуужин ашигласан байна. Украины тал нисгэгчгүй төхөөрөмж болон далавчит пуужингийн ихэнхийг устгасан гэж мэдээлсэн ч баллистик пуужингуудыг таслан зогсоох нь хамгийн том хүндрэл болсон байна.
Украины Ерөнхийлөгч Владимир Зеленский энэ нөхцөл байдлыг агаарын довтолгооноос хамгаалах системийн хомсдолтой холбон тайлбарлаж, ялангуяа АНУ-д үйлдвэрлэсэн “Patriot” системийн пуужинг нэн даруй нэмэгдүүлэх шаардлагатай гэж мэдэгдэв. Түүний хэлснээр баллистик пуужингийн эсрэг хамгаалалт хангалтгүй байгаа нь энгийн иргэдийн амь насанд шууд заналхийлж байна.
Орон сууц, хүүхдийн эмнэлэг, сургууль өртжээ
Киев хотын хэд хэдэн дүүрэгт дэлбэрэлт болж, 9 давхар орон сууц авах юмгүй эвдэрсэн байна. Мөн хүнсний агуулахууд, сургууль болон хүүхдийн эмнэлэг зэрэг иргэний байгууламжууд гэмтжээ. Зарим газарт пуужин, дроны хэлтэрхий унасны улмаас гал гарч, аврагчид нурангин дороос хүмүүсийг эрэн хайж байна.
Үүнтэй холбоотойгоор Киев хотын захирагч Виталий Кличко хотод гашуудал зарлав. Эрчим хүчний дэд бүтцэд учирсан хохирлын улмаас зарим оршин суугчийн халуун усны хангамж тасалдсан байна.
Румын, Молдавд ч сэрэмжлүүлэг болов
Довтолгооны цар хүрээ Украины хилээс давж, хөрш орнуудад ч аюулгүй байдлын арга хэмжээ авахад хүргэжээ. Дроны хэлтэрхий Румын улсын нутаг дэвсгэрт унасан бол Молдавын агаарын орон зайг зөрчсөн тухай мэдээлсэн байна. Польш мөн агаарын довтолгооноос хамгаалах хүчнүүдээ өндөржүүлсэн бэлэн байдалд оруулжээ.
Москва: Цэргийн болон ложистикийн обьектуудыг онилсон
ОХУ-ын тал цохилтоо Украины цэргийн зориулалттай обьект, дроны үйлдвэр, ложистикийн байгууламжуудын эсрэг хийсэн гэж мэдэгдсэн байна. Харин Украины тал нийслэл болон бусад хотод иргэний байгууламжууд өртсөн гэж мэдээлжээ.
Энэ хооронд Украин ч ОХУ-ын нутаг дэвсгэр дэх газрын тос, эрчим хүчний байгууламжуудад дроны цохилтоо нэмэгдүүлж байгаа аж. 2 талын харилцан цохилт сүүлийн өдрүүдэд эрчимжээд байна.
Киевийн томоохон довтолгоо нь Орос, Украины дайныг зогсоох дипломат хүчин чармайлт үргэлжилж буй үед болсон нь анхаарал татаж байна. Зеленский Украины байр суурь, саналуудыг АНУ-ын зуучлагчдад хүргүүлсэн ч гал зогсоох бодит ахиц одоогоор гараагүй байна.
Украины Ерөнхийлөгч агаарын довтолгооноос хамгаалах систем хурдан нийлүүлэхийг холбоотнуудаасаа дахин шаардав. Европын холбооны удирдлагууд Украины баллистик пуужингаас хамгаалах чадавхыг нэмэгдүүлэхэд дэмжлэг үзүүлэхээ илэрхийлжээ.
Ийнхүү Киевт болсон энэ удаагийн довтолгоо нь зөвхөн хүний амь нас, иргэний дэд бүтцэд хохирол учруулаад зогсохгүй, Украины агаарын хамгаалалтын системийн хомсдол болон Орос, Украины энх тайвны хэлэлцээний эмзэг байдлыг дахин харуулсан үйл явдал боллоо гэж “Reuters”, AP, “The Guardian” мэдээлэв.
