АНУ-ын Ерөнхийлөгч Дональд Трамп Онтарио нуурын нэрийг өөрчлөх тухай захирамж гаргасны дараа Google Maps АНУ дахь хэрэглэгчдэд уг нуурыг “Lake America” буюу “Америкийн нуур” хэмээн харуулж эхэлжээ.

Трамп наймдугаар сарын 27-нд Канадтай үүсээд буй худалдааны хурцадмал байдлын үеэр Хойд Америкийн таван Их нуурын хамгийн жижиг болох Онтарио нуурын нэрийг өөрчлөхөө зарласан байна. Энэхүү шийдвэр нь АНУ-ын албан ёсны газарзүйн нэрийн мэдээллийн систем болох GNIS-д мөрдөгдөх бөгөөд холбооны байгууллагуудын газрын зураг, баримт бичигт шинэ нэрийг ашиглахаар болжээ.

Google-ийн мэдээлснээр, тус компани албан ёсны газарзүйн нэрийн эх сурвалжуудыг дагаж газрын зурагтаа өөрчлөлт оруулдаг бодлогын хүрээнд нэршлийг шинэчилжээ. Иймээс АНУ-ын хэрэглэгчид “Lake America”, харин Канадын хэрэглэгчид “Lake Ontario” гэсэн нэрийг үргэлжлүүлэн харах юм. АНУ, Канадын гаднах хэрэглэгчдэд хоёр нэрийг зэрэгцүүлэн харуулах аж.

Гэхдээ Трампын захирамж Канадын газарзүйн албан ёсны нэршил болон олон улсын хэрэглээнд шууд нөлөөлөхгүй. Тиймээс Канад улс нуурыг цаашид ч Онтарио нуур хэмээн нэрлэсээр байна.

Канадын Ерөнхий сайд Марк Карни уг нэр өөрчлөлтийг эсэргүүцсэн бол Нью-Йорк мужийн захирагч Кэти Хокул “Нью-Йорк ингэж нэрлэхгүй” хэмээн мэдэгджээ. Харин хөрш Вермонт мужийн Бүгд найрамдах намын захирагч Фил Скотт Трампын шийдвэрийг “жижиг сажиг бөгөөд урам хугалсан” алхам гэж шүүмжилсэн байна.

Энэ нь Трампын засаг захиргааны газарзүйн нэршилтэй холбоотой хийсэн анхны өөрчлөлт биш юм. Тэрээр 2025 онд албан тушаалдаа эргэн орсныхоо дараа Мексикийн буланг “Америкийн булан” болгон нэрлэх захирамж гаргаж байсан бөгөөд Google Maps мөн АНУ дахь хэрэглэгчдэд зориулсан нэршлээ тухайн үед өөрчилж байжээ.

АНУ, Канадын худалдааны маргаан газарзүйн нэршил хүртэл өргөжиж, нэг нуурыг хоёр улсын хэрэглэгчид өөр өөр нэрээр харах боллоо.