ВАШИНГТОН. /Reuters/. АНУ-ын Сангийн сайд Скотт Бессент есдүгээр сарын 1-нд сэтгүүлчдэд мэдээлэхдээ, АНУ болон Хятад улс Ираны асуудлаар ялгаатай байр сууриас илүү нийтлэг зүйлтэй гэж мэдэгджээ.

Тэрбээр АНУ, Хятадын төлөөлөгчид Хойд Каролина мужийн Эшвилл хотод болсон “Их 20”-ийн уулзалтын үеэр Ираны асуудлаар “чимээгүй яриа хэлэлцээ” хийсэн гэж хэлсэн байна.

Бессент хоёр орны хооронд ямар асуудлаар ярилцсан талаар дэлгэрэнгүй мэдээлэл өгөөгүй байна. Түүний мэдэгдэлтэй зэрэгцэн Ойрхи Дорнодын нөхцөл байдал эрс хурцаджээ. Мягмар гарагт АНУ Ираны эсрэг олон тооны агаарын цохилт өгсөн бөгөөд үүний хариуд Иран цохилт өгсөн байна.

Ингэснээр сүүлийн хэдэн долоо хоногт харьцангуй тогтвортой байсан мөргөлдөөн ноцтойгоор хурцадсан гэж Reuters мэдээлжээ.

АНУ, Ираны хоорондын мөргөлдөөн дэлхийн эрчим хүчний зах зээлд хүчтэй нөлөөлж, газрын тосны үнийг өсгөхөд хүрээд байна. Мөн мөргөлдөөн удаан үргэлжилж буй нь АНУ-ын Ерөнхийлөгч Дональд Трампын дотоод дахь нэр хүндэд дарамт болж байгаа аж.

АНУ болон Хятадын хувьд Ираны асуудалд өөр өөр ашиг сонирхол, байр суурь байдаг ч дэлхийн эрчим хүчний нийлүүлэлт, Ойрхи Дорнод дахь тогтвортой байдал нь хоёр орны эдийн засагт шууд нөлөөлөх хүчин зүйл болж байна.