Пакистаны хоёр нисгэгч Хятадын “Тяньгун” сансрын станцад ажиллах анхны гадаадын нисгэгч болохын төлөө Бээжинд эрчимтэй бэлтгэл хийж байна. Зеешан Али, Хуррам Дауд нар хятад хэл сурахаас гадна төвөөс зугтах хүчний дасгал, жингүйдлийн нөхцөлд хооллох, унтах, тоног төхөөрөмж засварлах сургалтад хамрагджээ.

Тэд анх 20 орчим хүний бүрэлдэхүүнтэй шалгаруулалтаас үлдэж, эмнэлгийн үзлэг, сэтгэлзүйн тэсвэр болон өндөр хурдны нислэгийн үед үүсэх их хүчний ачааллыг даах чадвараар сонгогдсон байна. Пакистаны сансрын агентлагийн мэдээлснээр хоёрын хэнийг сансарт илгээх эцсийн шийдвэрийг 10 дугаар сарын дунд үеэс сүүлчээр гаргахаар төлөвлөжээ.

Сонгогдсон нисгэгч “ачааны мэргэжилтэн” буюу сансрын станцад Пакистаны шинжлэх ухааны туршилтуудыг хариуцан ажиллах үүрэгтэй байна. Тус улс их, дээд сургуулиудаас ирүүлсэн 300 гаруй санал дундаас Хятадын байгууллагууд хүнсний аюулгүй байдал, уур амьсгалын өөрчлөлттэй холбоотой биотехнологийн дөрвөн туршилтыг сонгожээ.

Хэрэв нислэг хэрэгжвэл Пакистаны иргэн сансарт ниссэн анхны тохиолдол болох бөгөөд Хятад улс анх удаа гадаадын сансрын нисгэгчийг өөрийн жолоодлогот сансрын хөлгөөр тээвэрлэх юм.