Ноорог.мн сайтын залуусыг өнгөрсөн шөнө баривчилж үйл ажиллагааг нь хааж байгаа асуудал олон нийтийн анхаарлын төвд ороод байна. Тус сайтын ажилтнуудыг шөнөжин байцааж залхаан цээрлүүлж байгаа энэ үйл явдал нь чөлөөт хэвлэлийн үйл ажиллагааг хааж боож байгаа төр засгийн цензур гэдэг шүүмжлэл цахим орчинд үүсээд байгаа юм. Ноорог.мн сайтыг MCS компанийн захиалгаар ажилласан гэдэг мэдээлэл тархсан. Харин тус сайтынхны зүгээс ямар нэгэн хууль бус ажиллагаа явуулаагүй, аль нэг компанийн захиалга байхгүй гэдгээ мэдэгдээд байна. Тэд УИХ-ын сонгуулиар өрнөсөн хууль бус үйл ажиллагааг харуулсан баримтат кино бэлтгэж байгаа нь “Үндэсний эв нэгдлийг бусниулах” гэж оролдлоо гэдэг үндэслэлээр үйл ажиллагааг нь зогсоож байцаалт авч эхэлжээ. Ноорог.мн сайтын ажилтнуудын компьютер, видео хард, гар утсыг хураан авсан бөгөөд хураан авсан эд хөрөнгөний бүртгэл хийгээгүй гэнэ. Залуу уран бүтээлчдээс бүрдсэн тус сайтынхныг хоорондоо харилцахыг хориглосон бөгөөд тэдний эсрэг ЦЕГ-ын Кибер гэмт хэрэгтэй тэмцэх газарт Фэйсбүүк хэрэглэгч зохиомол нэртэй этгээд гаргасан гэдэг мэдээлэл байгаа юм. Ноорог.мн сайтын залуусыг хоёр дахь удаагаа баривчилж байцаалт авч байгаа үйлдэл гарчээ. Энэ процессыг тэдний өмгөөлөгчдийн зүгээс Хэвлэлийн эрх чөлөөг ноцтой зөрчиж байгаа үйлдэл мөн гэсэн тайлбартай байна.