Ноорог.мн сайтын үйл ажиллагааг зогсоосонтой холбоотой асуудлаар цагдаагийн байгууллагаас тайлбар мэдээлэл өглөө.

ЦЕГ-ын Хэвлэл мэдээлэл, олон нийттэй харилцах хэлтсийн дарга, дэд хурандаа Г.Пүрэвдэлгэр: “Ноорог” пэйжийн хэвлэн нийтлэх үйл ажиллагаатай холбоотой буюу хийсэн пост, уран бүтээл, хийсэн кинотой холбоотой гүйцэтгэх ажиллагаа явуулаагүй гэдгийг Цагдаагийн байгууллагаас албан ёсоор мэдэгдье. Иргэдийн мэдээллийг хууль бусаар цуглуулж, хувь хүний мэдээлэлд халдсан нь урьдчилсан байдлаар тогтоогдсон. Одоо эрүүгийн хуулийн тийм зүйл ангиар шалгагдаж байна гэж хэлэх боломжгүй. Мөрдөн шалгах ажиллагааны хүрээнд мөрдөгч хуульд заасан үндэслэлийн дагуу санал гаргана.

Эрүүгийн цагдаагийн албаны Кибер гэмт хэрэгтэй тэмцэх хэлтсийн дарга, цагдаагийн дэд хурандаа С.Тайван: “Ноорог” пэйжийн контент бүтээгчдэд хэвлэн нийтлэх эрх чөлөө, хэвлэл мэдээллийн байгууллага гэдэг үүднээс мөрдөн шалгах ажиллагаа явуулаагүй.  Хувь хүний нууцад халдах, нууц задруулах, цахим мөрийтэй тоглоом зохион байгуулах гэмт хэргийн шинжтэй сэжүүр тэмдэг байж болзошгүй байсан учраас мөрдөн шалгах ажиллагааг явуулж байна. Прокурорын зөвшөөрөлтэй хойшлуулшгүй үйл ажиллагаа явуулж 8 иргэнийг саатуулсан. Үүнээс 7 иргэн нь өмгөөлөгчтэй мэдүүлэг өгөхийг хүссэн. Ингээд үүнийг нь хангаад мөрдөн шалгах ажиллагааны хүрээнд хуулийн дагуу мэдүүлэг авсан. Хууль зөрчсөн үйл ажиллагаа байхгүй. Мөрдөн шалгах ажиллагааны тактик янз бүр байдаг. Гэхдээ би энэ талаар ярих боломжгүй. Прокурорын зөвшөөрөлтэй байдаг.